Молитва блаженному Симону Юрьевецкому

Блаженный Симон Юрьевецкий

О Всесвятыя, Живоначальныя и Нераздельныя Троицы истинный угодниче и верный рабе, блаженне и приснопамятне Симоне! О избранниче Божий, еще и миру яко юрод бывый, но премудрых житием твоим удивляяй! О преукрашенный добродетельми дивный чудотворче Симоне! Се присно ублажаем и ублажати тя будем, предублаженнаго Господем нашим Иисусом Христом. Ты бо, поревновав всех праведных блаженству, оставил еси вся мира сего преходящая, и вослед верныя нашея радости и воскресения всесладчайшаго Иисуса потекл еси, и все сильною Того помощию даже Горняго Сиона достигл еси, идеже есть веселящихся жилище.

Ублажающе убо тя, прилежно молим, праведный человече Божий: призри на ны, в многая искушения впадающия, моли о нас неизреченную всех человек радость и упование, Собезначальнаго Отцу и Духу Единороднаго Сына и Слово Божие, да и нас, Того непамятозлобное милосердие прогневляющих, не оставит и вся на пользу нам да устроит, паче же да утвердит во своей православней, истинней и непорочней вере непоколебимо и праведными Своими судьбами да спасет нас, ниже да попустит ны искуситися паче, неже можем, и от бед же и печалей, присно на ны зде грех ради наших бывающих милостивно нас да избавит. Ей, молим тя, рабе Христов: якоже в жизни твоей на требующия помощи призирал еси, тако и ныне тебе молящихся не отврати, но предстани о нас ко Господу и от лютых падений молитвами твоими изми нас. Умоли Его да град твой сей, в немже, добродетельно пожив, Богу угодил еси, сохранит от всех навет вражиих и люди, в нем живущия, вечныя жизни достойны да покажет. Паки молим тя, блаженне Симоне: посещай нас, тебе молящихся, в нуждах наших. Да тобою заступаеми, непрестанно прославляем Христа Бога нашего, теплаго предстателя нам тя даровавшаго, яко Тому подобает всякая слава, честь и поклонение со Отцем и Святым Духом ныне, и присно, и во веки веков, аминь.

Молитвы Собору двенадцати Апостолов
Молитвы святителю Симону Печерскому, епископу Влад...
 

Комментарии

Здесь еще нет ни одного комментария!
Гость
15.12.2018
Copyright © Православная-Библиотека.Ru 2009-2018
Все права защищены.